PERDON

Sa pagmaw-ot na magkamay-on sin katoninongan, mapondo na an paratayan, nan makalibre sa mga kalamidad, nagkamay-on nin Perdon sa bilog na Parokya ni San Miguel Arkanghel. Ini binatogan san Pebrero 20, 2007. Kada alas kwatro sin aga, an mga Kapilya na-prusisyon sa pagpamibi asin pakimalooy sa Dios. Tinapos ini san Pebrero 28 sa paagi sin Banal na Misa na hinimo sa Irosin Public Auditorium na inupodan san intero na kapilya na nakisabay sa Perdon sa kanira mga barangay. Madudumduman na an Irosin an may pinaka-daghan na nagin biktima sin extrajudicial killings sa bilog na probinsya san Sorsogon. Susog sa Kura Paroko, Fr. Jimmy Barrozo, batog san 2005 may 19 na pig-Misahan asin dinapit sa parokya na gabos biktima kaining unsolved killings.

Feeding Program

An 6-month Feeding Program Activity san Commission on Service tinapos san Enero 31, 2007, sa paagi nin banal na Misa bilang pasasalamat sa Mahal na Diyos.
Pakatapos nin Misa, nag-organisa sin halipot na programa na inatindiran san mga magurang nan kanira mga kabataan. Naghatag man sin gift packs sa mga receipient families. Hinatagan sin certificate of appreciation an mga tawo na aktibong nagsuporta sa proyekto. Dako man an pasasalamat ni Padi Imbo, Kura Paroko, sa intero pa na naging instrumento para mareyalisar an proyekto na ine.
Sa onom kabulan na nakaagi, naimod an pagbabag-o sa timbang san mga kabataan nan mas daghan na kaaraman san mga magurang manungod sa pagpadako sa mga bata.

Primera Komunyon Maogmahon

San bulan na Pebrero nan Marso, an mga eskwela sa Grade-3 nagkumpisal nan nag-ako san Primera Komunyon sa kanira mga kapilya.
Ngani na magin mayad, maogma, nan makahulugan an kanira pag-ako san Sakramento, halaba na preparasyon an hinatag san mga katekista sa mga kabataan. Inayo man san mga katekista na suportahan sin mga mga magurang an nasabi na aktibidad na ini. Naghimo man sin mga bago na modules na itinuro sa mga bata. Bag-o matapos an school year, plano na mgaka-igwa nin Parish Catechetical Acheivement Test (PCAT) sa mga kabataan para maimod kun sinda nagtalubo o nakaaram san mga itinokdo san mga katekista. Hahatagan nin an mga awards sa Religion asin Values an mga maninigo na estudyante sa Recognition Day.

Youth Training Workshop Kinunduser

Matrayumpo na kinundukta an Youth Training Workshop san nakaaging Pebrero 3-4, 2007sa HSAI Compound. Ini pinamunuan ni Fr. Joel Bilan, Jr., Youth Director nan Core Group Members sa pangunguna ni Cyrel Baldorado,PYC Coordinator.
An mga parokya na sakop kan Vicariado ni San Miguel -- Magallanes, Gabao, Casiguran nan Juban – nagpadara sin tolo na representante na nagpartisipar sa workshop.
An tema san seminar mao an “Hearts on Fire: Empowering Tools in Youth Ministry”, na hiniras ni Mr. Jojo Enola, National Youth Director of Youth Link, Manila. Sa paagi sin mga workshops mas lalo pa nag-alab an entusyasmo san kada saro na magsirbe sa ministeryo sin kabataan.
Ine sayo na agyat sa mga kabataan na mas lalo maging produktibo an mga masunod pang aktibidades san grupo lalo na para sa ikakatalubo san kada saro.

Boses ni San Miguel, Mababati Na!

Nagbatog na an Programang Boses ni San Miguel sa Radyo. Ini inlunsar san nakaaging Enero 27, 2007. An Boses ni San Miguel sayo na programa san Commission on Media For Evangelization nan san Pastoral Council. Katuyuhan sadi na maipaabot sin direkta sa mga namamanwaan an Marhay na Bareta nan an agyat na mabuhay siring sa tunay na Kristiyano. Ini man an nagseserbing boses san kada Commission san ato parokya para maipaabot an mga reports, impormasyon nan mga aktibidades manungod sa mga Commission (Family and Human Life, Laity, Youth, Media for Evangelization, Worship, Education nan Service o FLY ME-WEST).
Ini na programa mababati sa Radyo Natin Station sa Irosin kada urhing Sabado san bulan sa oras na 12:00-1:00 an hapon. An Boses ni San Miguel pinapangunahan man nira Ms. Lorena Obida, CME Chairperson, Rev. Fr. Joel Bilan, Spiritual Director.